إلا النبي.. للشاعر سعيد حامد شحاتة

بقلم/ هشام النجار

هي قصيدة بالعامية المصرية منشورة على صفحات مدونة الشاعر سعيد حامد شحاتة ( اللون النبيتي).

وأجمل ما في القصيدة هو الفهم العميق للقضية وتداعياتها وأسبابها الحقيقية .. ثم ذلك الحشد المكثف لمعاني النصرة والولاء للرسول صلى الله عليه وسلم في قضية الرسوم المسيئة.. وتلك الصرخة المدوية التي أطلقها الشاعر في وجوه المسلمين.. يسألهم عن سبب ما اقترفه الغربيون في حق رسولهم وقائدهم.. ويستنكر قعودهم وخنوعهم وكسلهم وفرقتهم وتناحرهم وتخلفهم عن ركب التقدم.

ثم إعلان الرفض الذي ختم به قصيدته الجميلة.. رفض التطبيع.. رفض التواصل مع الشاتمين المسيئين.. وذلك كله باستخدام لغة بسيطة وتعبيرات متداولة نتكلم بها في بيوتنا وأماكن عملنا ومجالسنا وشوارعنا وأسواقنا.. الخ.

وهنا تكمن عظمة وروعة وسحر وإبداع شعر العامية.. حيث التعبير عن القضايا الضخمة بمفرداتتنا البسيطة ولغتنا اليومية.

إلا النبي.. هذا الاستثناء الشائع في الهتافات واللافتات بدلالته الواضحة يستعلن به أحد المحبين لرسول الله.. ولكن بطريقة مختلفة.. إنه في البداية يبرر تعلقه ومحبته لنبيه الذي يدافع عنه.

وكل سبب ذكره الشاعر يصلح عنوانا لمحاضرة أو مقال طويل يشرح كيف أن رسول الله صلى الله عليه و سلم (أول واحد خش ضلوعي بجد وداس) وكيف أنه (أول واحد هد السد الفاصل بين الناس) وكيف أنه (أول بذرة حب اتزرعت جوا الراس).

ثم يقدم الشاعر نفسه ويشرح رؤيته للواقع المرير بلغة أكثر مرارة (وانك تحط ايديك في أيد متنجسة) (وانك تطبطب فوق قلوب متيبسة) (وانك تحس إن الثوابت كلها طلعت فاشوش) (وانك تحس إن انت من جواك هاموش).. الخ.

ثم بعد أن يدلل على أنها مجرد مرحلة ضعف تمر بها الأمة أدت لاستعلاء الأعداء عليها ونيلهم من رموزها.. يتنبأ بعودة الروح للأمة وبانتفاضتها لتأخذ بحق نبيها وتثأر لكرامته.

وفي ختام القصيدة يستنهض الهمم والعزائم بأن يقدم نفسه فداء لرسوله مستخفا بعصا الغرب وجزرته.. محاولا حشد أكبر عدد من المحبين خلفه لإعلان غضبتهم ولنصرة رسولهم.. و ليدوسوا معه (على الشر بالجزمة).

إلا النبي..

بقلم الشاعر/سعيد شحاته

دا لأنك ..

أول واحد خش ضلوعي بجد وداس

ولأنك..

أول واحد هد السد الفاصل بين الناس

ولأنك..

أول بذرة حب اتزرعت جوا الراس

ولأنك..

أعظم كلمة أنا ممكن أقولها على الكراس

كلمة نبي

يا كل كائن في ( الزمان اللولبي )

يا كل سلطان أجنبي

يا كل واحد

عاش غبي و هيموت غبي

إلا النبي ..

أنا مش صبى وبياع كلام ..

عن أولياء الله وسيرة الأنبيا

ولا من هواة الضحك

في وشوش الكلاب و الأغبيا

ولا من هواة الهرتلة

ولا من هواة الأجوبة الفارغة

اللي ما لهاش أسئلة

ولا نفسي أقف ع المدنة وأحدف قنبلة

أنا بس شفت المسألة

إن اللي شايلين الرايات واقفين غلط

وان الكلاب في الغرب قاعدين بالزلط

ومن العبط

انك تشوف رايتك هناك متنكسة

وانك تشوف كل الجيوش متقدمة

وجيوشك انت مكسكسة

وانك تحط ايديك في أيد متنجسة

وانك تطبطب فوق قلوب متيبسة

وانك تحس

إن الثوابت كلها طلعت فاشوش

وانك تحس إن انت من جواك هاموش

وان الرتوش صبحت علم

وان القلم عمال بيكتب أجنبي

وان الكلاب في الغرب بيسبوا النبي

يا كل واحد عاش أبى لدرجة ملاك

مين اللي خلاك تنحني

مين اللي داس على عودك المفرود وخلاه ينتني

يا كل واحد عاش أبى

يا كل واحد عاش غبي و هيموت غبي

الغرب بيسبوا النبي

وأنا مكسبي العار والهلاك

الغرب راسم لامتلاك كل النفوس المتعبة

الغرب واقفين للرموز الطيبة

يا دموعنا يا للي انتي تمللي قريبة

هتفيد بأيه الطبطبة تحت الخيول

كل المعاني أتهلهلت جوا العقول

كل الكلاب في الغرب مقطوعة الديول

وولاد زناة الأرض بيسبوا الرسول

وأنا نفسي أقف وأهتف وأقول

إن الشعوب الطيبة مالت

وان الكواكب كلها انزالت

وان العيار الفالت اتحكم

مش جاي أقول الشعر وأتهكم

أنا جاى أقول الحق

إحنا خلاص داخلين زمان الرق

أنا نفسي أقول للأفعى جوا الشق

إن الأساس خايخ

وان السلام ويا الكلاب بايخ

وان الوجع شايخ على ضفاف القلوب

وان الضمير جامد جمود الطوب

وان الزمن مقلوب على دماغنا

وان الكلاب نازلين على صداغنا

أنا نفسي أقول للأفعى لداغنا

إن إحنا رغرغنا كما الأموات

وان التاريخ قلاب ماهوش فوات

وان السكات يمكن يكون خطة

واللي احنا فيه دلوقت دا محطة

والقطر لازم يستقيم ويفوت

حق الرسول هنجيبه بالنبوت

حق الرسول هنجيبه لو هنموت

حق النبي الغالي

أنا ليه بقيت بصرخ بصوت عالي

مش واقف أتفرج

الناس في سيرك كبير وبتهرج

يا رب يا مفرج كروب الصدر

أنا ناوي أقوم وأدعى في ليالي القدر

إني أتوهب لله ولأحبابه

وإني ما أخبط غير على أبوابه

وإني أبتسم قدام رسول الله

وأقعد معاه وأقعد مع أصحابه

يا رب تجمع قلبي في رحابه

واجعل كتابه الأول الآخر

ليه الكلاب عمالة تتقدم

وإحنا اللي ليه دايرين بنتاخر

مين اللي حط الردة ع الفاخر

ليه البواخر نايمة ع المينا

ليه انتظرنا الغرب يدينا

ليه سيبنا بعضينا على السكة

الفكه دايرة تهز في جيوبي

والتوب ده مش توبك ولا توبى

التوب دا توب أمريكا و الدنمارك

وأنا رافض التطبيع مع الخاين

الشمس طالعة ونورها مش باين

وأنا دمى مش هاين ومش خواف

وها أقولها حرة وعلقولي الناف

أنا كلى شوق للساحة والسياف

أنا مش هشيلك تاني ع اللكتاف

ولا ناوي أخاف منك وأطوف وأسعى

أنا عندي أشيل القصعة وأصبح حر

يغرق شراعك أو يطول البر

لازم ندوس ع الشر بالجزمة

لازم نقول سب الرسول أزمة

لازم نقف ويكون لنا لازمة

يا نموت في وسط الحر من غير زاد

الغرب بيسبوا النبي يا ولاد

سبوا النبي يا عباد بتعمل خير

سبوا النبي يا للي انحنيت للغير

يا كل طفل بيتولد بضمير

الغرب بيسبوا

يا كل كائن في الزمان اللولبي

يا كل واحد عاش أبى

لازم نقف ونقول لهم

إلا النبي ... إلا النبي

عودة الى ديوان الشعر